Міхайлаў Альберт Аляксеевіч

Міхайлаў Альберт Аляксеевіч (1947 – 2010)

Нарадзіўся ў горадзе Старыя Дарогі Мінскай вобласці. Скончыў Віцебскі дзяржаўны педагагічны інстытут, завочна Кіеўскі інстытут паліталогіі і сацыяльнага кіравання. Працаваў школьным настаўнікам, інжынерам райсельгастэхнікі, загадчыкам агульнага аддзела РК КПБ, намеснікам старшыні Старадарожскага райвыканкама па пытаннях сацыяльнай сферы і інфармаванні. Як мастак-графік аформіў кнігу паэта-земляка Алеся Усені “Я хачу на сваю планету”, кнігі вершаў старадарожскіх паэтаў “Расінка”, “Арэскія вытокі”, “Росныя далі”.

Паэт. Шэраг вершаў А. Міхайлава пакладзены на музыку, песні былі ўключаны ў рэпертуар ансамбляў “Песняры”, “Сузор’е”, “Бяседа”, “Алюр”. Аўтар слоў гімна Старадарожскага раёна. У бібліяграфіі пісьменніка зборнікі вершаў: “Спявай, труба!” (2004), “Пакланюся сваёй Беларусі” (2007).