Мінскае абласное аддзяленне ГА "Саюз пісьменнікаў Беларусі"

Мінскае абласное аддзяленне ГА «Саюз пісьменнікаў Беларусі» было створана ў 2006 годзе. Першым старшынёй быў выбраны вядомы паэт, заслужаны дзеяч культуры Рэспублікі Беларусь, лаўрэат прэмій імя Максіма Багдановіча і «Залаты купідон» Рыгор Васільевіч Сакалоўскі. З 2011 года да 2016 старшынёй быў  пісьменнік, лаўрэат прэмій «За духоўнае адраджэнне»,  «Залаты купідон», Расійскай літаратурнай прэміі імя В. Пікуля, прэміі Беларускага Саюза журналістаў «Залатое пяро» Алесь Карлюкевіч. З 21 лютага 2017 года старшынёй стала Святлана Анатольеўна Быкава.

Па дадзеных на 14.11.2017 года ў Мінскае абласное аддзяленне ўваходзяць 84 пісьменнікі. У Савеце аддзялення – 14 чалавек: Карлюкевіч Аляксандр Мікалаевіч – міністр інфармацыі Рэсрублікі Беларусь, Стэльмах Алена Анатольеўна – першы намеснік старшыні ГА “Саюз пісьменнікаў Беларусі”, Быкава Святлана Анатольеўна – старшыня Мінскага абласнога аддзялення СПБ, Ганушкіна Бажэна Юр’еўна – намеснік старшыні Мінскага абласнога аддзялення СПБ, Гіруць-Русакевіч Валянціна Францаўна, Даўгатовіч Барыс Дзмітрыевіч, Жукаў Павел Сямёнавіч, Кажура Віктар Віктаравіч, Карнаухава Ірына Аляксандраўна, Крыванос Леанід Міхайлавіч, Клімковіч Сяргей Уладзіміравіч, Ласенка Уладзімір Міхайлавіч, Прыгодзіч Зіновій Кірылавіч, Цыбульскі Канстанцін Пятровіч.

За год выходзяць дзясяткі кніг прозы, паэзіі, публіцыстыкі, краязнаўства, сотні твораў публікуецца ў перыядычных выданнях і калектыўных зборніках. Кожны год з удзелам пісьменнікаў аддзялення праводзіцца звыш 100 мерапрыемстваў, праходзіць каля 1000 пісьменніцкіх выступленняў у навучальных установах, бібліятэках, дзіцячых садках, вайсковых часцях і на пагранічных заставах, на прадпрыемствах і інш. Самыя адметныя падзеі — юбілейныя творчыя вечары пісьменнікаў, прэзентацыі новых кніг, мастацкія святы і фестывалі, мерапрыемствы па ўшанаванні памяці класікаў беларускай літаратуры. Пісьменнікі прымаюць актыўны ўдзел у рэспубліканскіх мерапрыемствах, якія арганізоўваюць Міністэрства інфармацыі, Міністэрства культуры, Міністэрства абароны, Саюз пісьменнікаў Беларусі, Беларускі саюз журналістаў  і інш.

Сумесна з Мінскім абласным выканаўчым камітэтам заснавана штогадовая Мінская абласная прэмія ў галіне літаратуры за лепшыя кнігі пісьменнікаў Міншчыны ў чатырох намінацыях.

Дзейнасць аддзялення праводзіцца ў цесным кантакце з галоўным упраўленнем ідэалагічнай работы, культуры і па справах моладзі Мінаблвыканкама, а таксама з РВУ «Выдавецкі дом «Звязда», рэдакцыямі газеты «Мінская праўда», раённых газет, Мінскай абласной арганізацыяй Беларускага Саюза журналістаў, Мінскай абласной бібліятэкай імя А.С. Пушкіна.

У планах аддзялення — выданне калектыўнага зборніка, заснаванне серыі кніг «Міншчына літаратурная», пашырэнне сеткі літаратурных аб’яднанняў пры раённых бібліятэках і аддзелах культуры райвыканкамаў Мінскай вобласці.