Увага! Конкурс!

Увага! Конкурс апавяданняў газеты “Звязда” працягваецца. Запрашаем прыняць удзел!

Кожная вялікая дарога пачынаецца з аднаго самага першага маленькага крока. І шлях у літаратуру тут – не выключэнне. Таму так важна для аўтара не прапусціць момант заявіць аб сабе свету і быць заўважанымі.

“Звязда” таксама дае магчымасць сваім чытачам далучыцца да кола аўтараў. Зрабіць гэта можна праз конкурс апавяданняў, што традыцыйна праводзіць наша газета. Летась да ўдзелу ў ім мы атрымалі многа допісаў сталых і маладых аўтараў. Нехта дзяліўся ўспамінамі пра ўласнае жыццё, нехта прадстаўляў сапраўды прафесійную прозу, а нехта пісаў нам, каб атрымаць параду куратара – вядомага пісьменніка, дырэктара выдавецтва “Мастацкая літаратура” Алеся Бадака. Дарэчы, ён усё па-ранейшаму будзе апекавацца конкурсам разам з нашай рэдакцыяй у 2017 годзе.

Нагадаем умовы конкурсу:

разглядаецца толькі адно апавяданне ад аднаго аўтара (!) памерам да 5 старонак (ці да 10—12 тысяч знакаў). Гэта павінна быць апавяданне на беларускай мове, якое нідзе дагэтуль не друкавалася. Рэдакцыя пакідае за сабой права не рэцэнзаваць і не вяртаць творы.

Апавяданні накіроўвайце на адрас: газета «Звязда», вул. Б. Хмяльніцкага, 10а, 220013, г. Мінск, з пазнакай «На літаратурны конкурс». Можна дасылаць апавяданні на электронны адрас: іnfо@zvіаzdа.bу таксама з пазнакай «Літаратурны конкурс».

Шаноўныя аўтары!

Абавязкова паведамляйце сваё прозвішча і імя (сапраўднае), імя па бацьку, дакладны паштовы адрас і поўныя пашпартныя звесткі (нумар, кім і калі выдадзены, асабісты нумар),  а таксама кантактны тэлефон.

Калі ласка, напішыце колькі слоў пра сябе: чым займаецеся, калі і пад уплывам чаго пачалі пісаць.