Пачатак Тыдня дзіцячай Кнігі ў Заслаўі
Тыдзень дзіцячай Кнігі ў горадзе Заслаўе ў гэтым годзе пачаўся адметнай падзеяй. Першы дзень гэтага свята Кнігі прыйшоўся на 21 сакавіка – Сусветны Дзень паэзіі. У гэты дзень Заслаўская дзіцячая бібліятэка сустракала гасцей – вучняў пачатковых класаў Заслаўскай сярэдняй школы №2, якія адпачываюць на канікулах у прышкольным лагеры. На гэты раз артыстамі і паэтамі, якія выступалі перад прысутнымі, сталі члены літаратурнага дзіцячага клуба «Ізяслаўцы», што працуе пры Заслаўскай гімназіі і якім кіруе паэтэса і казачніца, член Саюза пісьменнікаў Беларусі Святлана Анатольеўна Быкава.
Пачалася сустрэча з інсцэніраванага прывітання з гульнямі і загадкамі, якое правялі супрацоўнікі бібліятэкі на чале з яе загадчыцай Грыгор’евай Наталляй Віктараўнай, якая выступіла ў ролі Каралевы Кніг. Другая супрацоўніца бібліятэкі, Аўласовіч Людміла Аляксандраўна, на нейкі час ператварылася ў Нязнайку, а Строк Наталля Віктараўна дапамагала абодвум казачным героям у інсцэніраваным выступленні. Каралева Кніг і Нязнайка правялі з вучнямі некалькі віктарын на веданне імі герояў кніг і іх аўтараў, заахвочваючы дзяцей жэтонамі, якія ў канцы сустрэчы былі абмененыя на салодкія прызы. Самым актыўным удзельнікам віктарын паэтэса Святлана Быкава падарыла свае кнігі.
Пасля гэтага слова было дадзена кіраўніку клуба «Ізяслаўцы» Быкавай Святлане Анатольеўне, якая прадставіла прысутным маленькіх паэтаў – членаў гэтага клуба. Іх было шасцёра: вучаніцы 5 класа Скальская Ліза, Шымановіч Ксенія, Здор Варвара, Сінькевіч Ганна і вучаніцы 7 класа Валяватая Віка і Бабушкіна Ангеліна. Дзяўчынкі пад апладысменты прысутных з задавальненнем прачыталі свае вершы.
Трэба сказаць, што клуб «Ізяслаўцы» зусім малады, ён быў створаны ў канцы восені мінулага года. Таму для маладых паэтаў гэта выступленне стала артыстычным дэбютам.
Святлана Быкава пазнаёміла прысутных з вынікамі працы паэтычнага клуба і запрасіла ўсіх, хто піша вершы, на яго пасяджэнні, якія праводзяцца кожны тыдзень у Заслаўскай гімназіі. Напрыканцы яна вырашыла даведацца, як дзеці ведаюць беларускую мову, і прачытала свае загадкі на роднай мове, якія дзеці актыўна і з цікавасцю разгадвалі.
Вучні пакідалі чытальную залу бібліятэкі вясёлыя, задаволеныя сустрэчай і з пачуццём падзякі да ўсіх, хто зладзіў ім такое свята Кнігі.
