Літаратурны марафон да Дня маці “Маці, мілая маці…”. Рагнед Малахоўскі

Матулі

У час, калі гаснуць агні

І мары спавіты спакоем,

Мяне да грудзей прыхіні

Сваёю пяшчотнай рукою.

 

Цень свечкі варожыць на сон,

Цікуе з-за воблака поўня.

Па хвалях душы срэбны звон

Плыве беражніцай на чоўне.

 

Я сны твае сэрцам прыму

Як голас святой Беларусі.

Начамі, калі не да сну,

На вобраз матулі малюся.

 

 

Галінка бэзу

                                               Маёй Матулі

Сцяжынка ўецца між бярозак беластволых,

Душа смяецца і працягвае любіць.

Гарыць агеньчык у вачах ад слёзаў кволых.

З глыбокай верай сэрца б’ецца зноўку жыць.

 

Галінка бэзу разважае у праменні

Льнянога сонца, што распальвае расу,

Куды лятуць зачаравана летуценні,

Што заплятаюць з каласоў жыцця касу.

 

Блакіт прасторы водар кветкавы люляе,

Гудзе, заняты дружнай працай, пчолак рой.

Бялюткі бэз павевы ветрыку вітае

І зачароўвае расквечаны настрой.