І душа з душою гаварыла…

   “Паэзіі акрыленая муза” – так называлася сустрэча ўдзельнікаў народнага літаратурна-мастацкага аб’яднання “Рунь” з чытачамі і супрацоўнікамі Валожынскай раённай бібліятэкі. А прысвечана яна была Сусветнаму дню паэзіі. Работнікі  бібліятэкі да гэтага дня аформілі  выставу калектыўных і ўласных кніг “рунеўцаў”. 

 І душа з душою гаварыла – так можна сказаць пра названае мерапрыемства. Марыя Шакун, Сафія Русецкая, Надзея Агіевіч, Галіна Марцінкевіч, Дзмітрый Краскоўскі і аўтар гэтых радкоў расказвалі пра сваю сустрэчу з паэзіяй і адданасць ёй, раскрывалі душу перад прысутнымі, выносячы на іх суд уласныя творы. А тыя, хто быў у зале – упітвалі пачутае  сваёй душой. Гэта было бачна па іх тварах, якія то балюча, то прасветлена, то ўсмешкай ці нават смехам рэагавалі на разнапланавыя і разнатэмныя вершы паэтаў Валожыншчыны. Гэта чулася і ў такіх цёплых, шчырых да ўзнёсласці  словах падзякі ў адрас землякоў-творцаў.

Валянціна Гіруць-Русакевіч