Запісы катэгорыі: Песні

Сл. В.Гіруць-Русакевіч, муз. Я.Ксяневіч. Я кахаю цябе

Валянціна Гіруць-Русакевіч (нар. у 1953 годзе) — выдатная беларуская паэтэса. Друкавацца пачала яшчэ васьмікласніцай у ашмянскай раённай газеце. У розныя гады працавала карэспандэнтам, карэктарам, загадчыкам аддзела інфармацыі Валожынскага райвыканкама. Многа гадоў прысвяціла рабоце з маладымі літаратарамі ў народным літаратурна-мастацкім аб’яднанні «Рунь» Валожынскага РЦК. Член СП Беларусі. Аўтар зборнікаў «Я адкрываю вам душу», «Пад зоркаю лёсу», «Мовай сэрца».

Вершы — Валянціна Гіруць-Русакевіч, музыка — Яўген Ксяневіч.

Куплет 1:

Я табе нічым не абавязана,

Апрача кахання

Юнага, што не заўсёды звязвае,

А бывае найчасцей растайным…

Я табе нічым не абавязана,

Акрамя любові,

Акрамя таго, што ўсё-ткі сказаны

Першаму табе тры тыя словы…

Прыпеў:

Я кахаю цябе. Кольці часу, здаецца,

Адляцела, сплыло хуткаплыннай ракой,

А у шчасці й журбе юнай ласкаю сэрца

Цеплыня ахіне — я кахаю цябе…

Куплет 2:

Я табе нічым не абавязана,

Акрамя ўспамінаў,

І яны прыходзяць, незаўважныя

Для старонніх, як і быць павінна.

Я табе нічым не абавязана,

Акрамя любові,

Акрамя таго, што ўсё-ткі сказаны

Першаму табе тры тыя словы…

Прыпеў.

Яўген Ксяневіч

Крыніца: Звязда

Сл. Я.Пясецкага, муз. Я.Ксяневіч. Споведзь

Яўген Пясецкі (нар. 07.01.1949) — беларускі паэт, член Саюза пісьменнікаў Беларусі. Журналіст, адзін з найстарэйшых фотакарэспандэнтаў краіны. Узнагароджаны медалём Францыска Скарыны.

З Яўгенам Пясецкім мы знаёмыя з дзіцячых гадоў. Жылі на адной вуліцы, вучыліся ў адной зеленаборскай школе, дзе беларускую мову выкладала мая маці… Сёння, праз столькі гадоў пасля нашага знаёмства, я разам з земляком і школьным сябрам рады прапанаваць вам сваю новую песню.

Вершы — Яўген Пясецкі, музыка — Яўген Ксяневіч

Куплет 1:

Было светла і ціха ў хаце,

Клён да ганку хіліўся ў журбе.

На дарогу мне зычыла маці:

«Хай Гасподзь беражэ цябе!»

Прыпеў:

Ніколі ў Бога не прашу нічога —

Нашто мне той залішак, калі маю

Акраец хлеба, дальнюю дарогу

І маці, што мяне чакае.

Куплет 2:

Успамін гэтай светлай далі

Жыццядайную моц дае.

Колькі потым мне людзі казалі:

«Хай Гасподзь беражэ цябе!»

Куплет 3:

Не пагасне агонь прад іконаю,

Не зацягне чужынскі хаўрус,

Покуль чую крыжом бласлаўлёнае:

«Хай Гасподзь беражэ Беларусь!»

Яўген Ксяневіч

Крыніца: Звязда